बलेवा / पोखराबाट मुस्ताङका लागि उडेको तारा यएरको नाइन एन एइटी ट्विनअटर विमान आज बिहान औसतभन्दा कम उचाइमा थासाङ पुगेको जानकारी प्राप्त भएको छ । जहाज अहिलेसम्म पनि सम्पर्कविहीन अवस्थामा रहेको छ ।
बिहानैदेखि नै उक्त स्थानमा हल्का वर्षा भइरहेको सो समयमा घरभन्दा केही माथि एउटा हवाईजहाज दुई तीनपटक घुमेको देखेको थासाङ गाउँपालिका–२ बोक्सेखोलाका विकल बागदासले बताएका छन् ।
‘हामी खाना खाँदै थियौँ, हवाईजहाज धेरै पटक घुमेको थियो,’ उनले भने, ‘हल्का कुहिरो लागेर पानी परिरहेको थियो ।’ उनले यसअघि मुस्ताङ जाने जहाज यति धेरै तल आएको नदेखेको बताए ।
‘घरमै ठोकिन्छ जस्तो गरेर दुई, तीन पटक घुम्यो, हामी गाउँले सबैले बाहिर निस्केर हेरेका थियौँ,’ उनले भने, ‘केहीबेरमा अलिमाथि उडेर गयो, पानी परेकाले घुमेको होला भन्ने लागेको थियो ।’
त्रिभुवन अन्तर्राष्ट्रिय विमानस्थलले दिएको जानकारी अनुसार उक्त जहाजको ‘इमरजेन्सी लोकेसन ट्रान्समिटर सङ्केत’ फेला परेको छ । प्राप्त भएको सङ्केतअनुसार जहाज केही वस्तु वा पहाडमा ठोकिएको पनि देखिएको छ ।
तर जहाज ठोकिएको आशङ्का गरिएको स्थान मानव बस्तीभन्दा निकै उच्च पहाडमा पर्ने उनले बताए ।‘त्यो पहाड निकै टाढा र अप्ठ्यारो ठाउँमा हो, अहिले त जान सकिँदैन,’ उनले भने, ‘आकाश खुल्यो भने हेलिकप्टरमा जान सकिएला ।’
सम्पर्कविहीन भएको तारा एयरको विमानमा १९ जना यात्रु लिएर बिहान ९ बजेर ५५ मिनेटमा पोखराबाट उडेको थियो । मुस्ताङका प्रमुख जिल्ला अधिकारी नेत्रप्रसाद शर्माका अनुसार म्याग्दी, मुस्ताङ, पर्वत र कास्कीका सम्भावित सबै ठाउँमा खोजी भइरहेको छ ।
जहाज हराएको थाहा पाउने बित्तिकै तत्कालै खोजीकार्य शुरू गरेको भएपनि जहाज अहिलेसम्म सम्पर्कविहीन अवस्थामा नै रहेको छ । अहिले मुस्ताङका अधिकांश ठाउँमा बाक्लो बादल लागेर पानी परिरहेको स्थानीयले बताए । प्रतिकूल मौसमका कारणले खोजिकार्यमा थप कठिनाई उत्पन्न भएको छ । तस्वीर – फाईल ।
